Pakdamani Ka Hukum Aur Uski Dunyawi Aur Ukhrawi Barkaat 2/2

Pakdamani Ka Hukum Aur Uski Dunyawi Aur Ukhrawi Barkaat 2/2

Isse pehli chand Aayaat e Quraaniya Pakdamani ke ziman me bayan ki gayi ab unke baad is silsile ki kuch Ahadees e Shareefah bhi naqal ki jati hain.
Jab koi Aurat Panjwaqtah Namazon ka Ahtemam kare, Apni Sharmgaah ki hifazat kare aur Shauhar ki Ita’at kare to wo Jannat ke jis darwaze se chahe Dakhil hojaye.
(Ibn e Hibban 6/451)
Bukhari o Muslim me Hazrat Abu Hurairah Razi Allahu anhu se marwi hai keh Nabi Kareem sallallahu alaihi wasallam ne farmaya:
Saat (7) Qism ke aadmi hain jin ko Allah Ta’ala Qayamat ke din Apne Arsh ke saaye me rakhega jab keh Us ke Arsh ke ilawah kahiin aur saaya na hoga, un saat (7) Aadmiyon me se ek who Naujawan bhi hai jis ko koi Husn o Jamal aur Maal o Daulat wali Aurat apni taraf maayel kare magar wo yeh keh kar ke Mai Allah se darta hun us ke shar se bach jaye. (Bukhari o Muslim)
Tirmizi waghaira me Hazrat Ibn e Umar razi Allahu anhumaa se riwayat hai keh Unho ne Nabi Kareem sallallahu alaihi wasallam ki zaban e Mubarak se muta’addad baar ye waqia suna keh Bani Israil me ek Badkaar o Gunahgaar shakhs “KIFL” naami tha us ke paas ek Ladki kisi Zaroorat se majboor hokar aayiusne us ko 60 Dinaar is shart par diye keh wo use badkaari karegi, wo Ladki Majbooran raazi hogayi, phir jab hasb e wada wo ladki us ke paas aayi to us ne badkaari ki tayyari shuroo ki aur jab qareeb hokar hum bistari karne hi wala tha keh Ladki kaampne aur rone lagi, us ne us ki wajeh poochi to ladki ne kaha: Maine aisi harkat kabhi nahi ki, Aaj ek Majboori ne yahan tak pohancha diya us ladki ki hayaa se mutassir ho kar wo shakhs fauran is se alahda hogaya aur kehne laga : to ek Aurat hokar Allah ka itna khauff karti hai to mujhe is se ziada Allah se darna chahye, maine tujhe jo raqam di thi wo lele aur yahan se chali jaa, Mai aaj ke baad Allah ki nafarmani kabhi na karunga, Allah Ta’ala ka karna keh usi raat me us shakhs ki maut aagayi, logon ne Subah us ke darwaze par ye likha hua dekha “إِنَّ اللَّهَ قَدْ غَفَرَ لِلْكِفْلِ” Allah Ta’ala ne KIFL ki maghfirat farmadi.
Subhan Allah! Kaisi qadr afzaai hoti hai Malik e beniyaaz ki taraf se Apne Bando ki!
Bukhari o Muslim ne Hazrat Abdullah Bin Umar razi Allahu anhumaa se riwayat kiya hai keh Nabi kareem sallallahu alaihi wasallam ne farmaya Teen (3) aadmi apne safar ke dauraan ek ghaar me thaire, achanak ek badi chattan ladhak kar giri jis se us ghaar ka munh bandh hogaya, aur baher nikalne ki koi soorat na rahi, yeh log bhot pareshan hue phir is baat par sab muttafiq hogaye keh Apne Aamaal e Saaliha me se kisi Mukhlisana amal ke hawale se Allah Ta’ala se madad Talab ki jaye chunanche unho ne ghaur kar ke apne ek ek SALEH Amal ke hawale se Dua karna shuru ki aur har ek ki dua par chattan thodi thodi khisakti rahi bil aakhir itna rasta bana keh wo log basahuulat bahar Nikal aaye, un teeno ki duaon me se ek Dua ye thi:
“Aye Allah! Meri ek chachazaad bahen thi aur wo Mujhe bhot mehboob thi , Mai us ko burai ke liye phislata rahta tha magar wo inkar karti rehti thi, yahan tak keh ek martaba khushk saali ke asraat se mutassir hui to tangi o pareshani me mubtala ho kar mere paas madadchahne aayi thi, Maine bhi mauqe se faida uthate hue us ko ek sau bees (120) Dinar is shart par diye keh wo Mujhe badkari ka mauqe degi, phir jab usne mauqa diya aur us ke sath Jimaa’ ke qareeb hua to usne kaha: mere kanware pan ko is tarah Haram ke zarye todna tere liye kaise durust hosakta hai? Aye Allah! Ye sunte hi mai fauran us se door hokar doosra janib chala gaya aur wo maal bhi us se wapis nahi liya, halaanke us ladki se mujhe Had se ziada Ishq tha, Aye Allah! Agar Maine ye amal us waqt sirf teri hi Razaa o Khushnoodi ke liye aur tere hi khauf se kiya tha to tu hamari ye mushkil door farmade. To Allah Ta’ala ne us chattan ko apni Qudrat se khiskaa diya. (Muslim :2743)
Waqaai ye kitni badi Qurbani aur kaisa azeem iisaar hai. Zara Ghaur kijye! Ek Naujawan kisi Haseena par farefta ho aur Arse se use rajhane aur manane me mashghool ho aur wo inkar hi karti jarahi ho, itne me halat o hawadis ne khud us ko majboor kar ke aur Mohtaaj bana ke us ke darwaze par laa khada kiya ho us majboori se wo ab Khalwat o Sohbat ka mauqa dene ke liye bila kisi dabaao ke tayyar bhi hogayi ho, phir aise waqt jab doori ke tamam hijabaat uth gaye aur aadmi ki jawani ki jaulaani , Shehwat ke ishte’aal aur apni Mashooqah ke ishq me choor ho kar us par sawar hone hi wala ho keh Allah Ta’ala ka naam aur Haq e Islam kaan me padte hi fauran apni Deewangi o Junoon se dastbardaar ho kar ek taraf ko hojaye aur Gunah se bach jaye, kehne Likhne ko to ye bhot aasan hai magar jis ke Seene me dil hai wo samajh sakta hai keh ye koi Mamooli Qurbani aur halki si baat nahi bhot bade ikhlaas o Imaan ke jazbe se sadir hone wala العمل الصالح hai, tab hi to Qubooliyat ka sharf hasil hona dunya hi me maloom hogaya, إِلَيْهِ يَصْعَدُ الْكَلِمُ الطَّيِّبُ وَالْعَمَلُ الصَّالِحُ يَرْفَعُهُ isi liye farmaya gaya hai. Is me us shakhs ke liye badi Ibrat o Naseehat ka saaman hai jo Parhezgaari ka rasta ikhtyar karna chahta hai aur jo kisi aisi aazmaish me phans kar us se najaat pane ka khahish mand ho.
Imam Bukhari ne Hazrat Sohail Bin Sa’ad razi Allahu anhu se riwayat kiya hai keh Aap sallallahu alaihi wasallam ne farmaya:
“Jo Shakhs do Jabdon ke darmiyani Uzu (Zaban) aur Do raano ke darmiyani uzu (Sharmgah ) ki hifazat ki Zamant lele mai uske liye jannat ki zamanat leta hun.” (Bukhari :6474)
Imam Baihaqi rah ne Hazrat Abdullah Bin Abbas Razi Allahu anhuma se riwayat kiya hai keh Nabi kareem sallallahu alaihi wasallam ne farmaya:
“Aye Quraish ke Naujawano! Apni Sharmgaahon ki hifazat karo, Zinakaari mat karo, Suno! Jisne Apni Sharmgah ki hifazat ki us ke liye Jannat ki basharat hai.”
(SunanBaihaqi :4/5369)
Imam Bukhari rah ne Hazrat Abu Hurairah razi Allahu anhu se riwayat kiya hai keh Hazrat Ibrahim alaihis salam jab Hukm e Khudawandi se Hazrat Saarah ko lekar Hijrat farma rahe the to raste me ek aise shahar par pohanche jahan ka badshah (ya Ghunda) aisa tha keh kisi bhi Musafir ki biwi pasand aajaye to jabran us par Qabzah karleta tha jab us ko in hazraat ke bare me ittela mili to Aadmi bhej kar puchwaya keh Tumhare sath ye kaun Aurat hai? Unho ne us ke zulm se bachne ke liye – ye taweel karte hue keh is jagah mere aur meri biwi ke ilawah koi Saahib e Imaan nahi hai- jawab diya keh ye meri bahen hai, Hazrat Saarah razi Allahu anha ko bhi batla diya keh Imaani Ukhuwwat ke rishte se maine Bahen kaha hai tum bhi isi rishte se mujhe Bhai batla dena, ye takeed kar ke us aadmi ke sath Hazrat Saarah razi Allahu anha ko rawana kardiya, jab wo darbar me pohancheen aur us badshah ne un par dast darazi ka irada kiya to wo Fauran khadi huiin, 2 Rakat Namaz padhi aur Allah Ta’ala se dua ki: Aye Allah ! agar Aap par aur Aap ke Rasool par Sacha Imaan laya hai aur Apni Sharmagah ko siwaye Shauhar ke aur kahin istemal nahi kiya hai to is kaafir se Mujhe bachayye aur us ko mujh par tasallut na dijye, jaise hi unho ne Dua Ki wo Maflooj ho kar pairon ke bal gir pada, Hazrat Abu Hurairah razi Allahu anhu farmate hain keh Jab Unho ye haal dekha to unho ne phir Dua ki keh: Aye Allah! Agar ye is tarah reh jayega to log Mujhe ilzam denge keh tu hi iski qaatil hai, ye to aur badi mushkil hojayegi, is dua se wo saheeh hogaya ,usne phir dast darazi ki koshish ki unho ne phir dua ki phir usi tarah behosh hokar girpada teesri dafa usne apne Khuddam ko bulakar kaha: Bakhuda tum logon ne mere paas kis Shaitanni ko bhej diya hai? Ise yahan se le jaao aur Ibrahim (alaihissalam) ke hawale kardo, aur is ko ek Khadimah bhi dedo.
Mazkoorah baala tamam Aayat ,Ahadees aur Waqiaat se pata chalta hai keh Islam ne Musalmano ko Haya o paakdamani ki kitni targheeb di hai aur ye keh ye sifaat Allah Ta’ala aur Uske Rasool sallallahu alaihi wasallam ke Mehboob banne ka Waseela hai, neez aise bando aur bandiyo ko Allah Ta’ala Dunya o Aakhirat ki kamiyabiyon se ham kinaar karte hain.
Allah Tamam Musalmano ko Paakdaman banaye aur Nazron ki, Dilon ki , Zaban ki aur Sharmgahon ki Hifazat karne ki taufeeq ata farmaye.
Aameen

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s