Na Ahel ko Vote dena Shadeed tar Gunah hai

Na Ahel ko Vote dena Shadeed tar Gunah hai

Baaz Hazraat ye bhi sochte hain ke Agar na Ahel ko Vote dena Gunah hai to hum kaun se paak baaz hain? Hum subah se le kar shaam tak beshumaar Gunahon me Mulawwis rehte hain. Agar apne Gunahon ki taweel Fehrist me ek aur Gunah ka izafa hojaye to kya harj hai?

Lekin Khoob samajh lijye ke ye Nafs o Shaitan ka sab se bada dhoka hai, awwal to insan agar har Gunah ke irtekaab ke waqt yahi socha kare to wo kabhi kisi Gunah se nahi bach sakta, agar koi shakhs thodi si gandagi me mulawwis hojaye to us ko us se paak hone ki fikr karni chahye na ke wo ghalazat ke kisi talaab me chalaang lagade.

Doosra baat ye hai ke Gunah Gunah ki nauiyyaton me bhi bada farq hai, jin Gunahon ke nataij bad poori qaum ko bhugatne paden, in ka mamla private Gunahon ke muqable me bhot sakht hai. Inferadi nauiyat ke jaraim khwah apni zaat me kitne hi ghinawne aur shaded hon, lekin un ke asraat do chaar afraad se aage nahi badhte. Is liye un ki talafi bhi umooma ikhtyar me hoti hai, un se Tauba o Istighfaar karlena bhi aasan hai aur unke muaaf ho jane ki umeed bhi har waqt ki jasakti hai. Aur us ke bar khilaf  jis Gunah ka bura natija poore mulk aur poori Qaum ne bhugta ho, us ki talafi ki koi soorat nahi, ye teer kamaan se nikalne ke baad wapis nahi aasakta is liye agar kisi waqt insan is bad amali se aainda ke liye Tauba karle to kam az kam Maazi ke jurm se Ohda baraa hona bhot mushkil hai aur us ke azaab se rihaai ki umeed bhot kam hai.

Is haisiyat se ye Gunah chori, Daaka, Zina kaari aur doosre tamam Gunahon se shaded tar hai aur use doosre jaraim par qiyaas nahi kiya jasakta.

Ye durust hai ke hum subah o shaam beesiyon Gunahon ka irtekab karte hain, magar ye sab Gunah aise hain ke Allah Ta’ala kisi waqt Tauba ki taufeeq bakhsha to maaf bhi hosakte hain aur un ki talafi bhi ki jasakti hai. Lekin is ka matlab ye hargiz nahi hai ke hum apni Gardan ek aise Gunah me bhi phansaa len jis ki talafi na mumkin aur jis ki muaafi bhot mushkil hai.

Baaz log ye bhi sochte hain ke Laakho voton ke muqable me ek shakhs ke vote ki kya haisiyat hai? Agar wo Ghalat istemal bhi hojaye to mulk o Qaum ke mustaqbil par kya asar andaza hosakta hai? Lekin Khoob samajh lijye ke awwal to agar har shakhs vote daalte waqt yahi sochne lage to zaahir hai ke poori aabadi me koi ek vote bhi saheeh istemal nahi hosakega. Phir doosra baat ye hai ke voton ki ginti ka jo nizaam hamare yahan raaij hai us me sirf ek an padh, jahil shakhs ka vote bhi mulk o millat ke liye faisla kun hosakta hai, agar ek be deen, bad aqeeda aur bad kirdaar umeedwaar ke Ballot box me sirf ek vote doosre se ziada chala jaye to wo kamiyaab hokar poori qaum par musallat hojayega, is tarah baaz auqaat sirf ek jaahil aur an padh insaan ki mamooli si ghaflat, bhool chook ya bad diyanati bhi poore mulk ko tabah karsakti hai. Is liye murawwaja nizaam me ek vote qeemti hai aur ye har fard ka Sharii, Akhlaaqi, Qaumi aur Milli Fareeza hai ke wo apne vote ko itni hi Tawajjeh aur ahmiyat ke sath istemal kare jis ka wo fil waaqae mustahiq hai .

وما علینا الا البلاغ

(Intekhabaat me Vote ki Sharii haisiyat by Mufti Taqi Usmani db)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s