ALAAMAATE MEHDI KI RAUSHNI ME SHAKEEL KA POST-MORTEM:5

Aathwin Alamat:

Ahd-e-Aakhir me millat ki zaboon haali par khaasaan-e-Ummat maahi be aab ki tarah tadap rahe honge, unki khwahish hogi ke Mehdi jald az jald Zaahir hokar Baatil taqaton ka zor torden aur Aalam-e-Islam ek baar phir Shaan o Shaukat ke buland maqam par faayiz ho, chunanche Musnda Ahmad, Musannaf Ibne Abi Shaibah, Sunan Abu Dawood, Ausat Tabrani aur Mustadrak Hakim waghaira ki Saheeh Riwayaat batati hain ke Hijazi  Hakim ki wafaat ke baad Imam Madeene se Bhaag kar Makkah aajayenge, Mubada log un par Hukumat ki zimme dariyan daal den, lekin Un ki Ghair Mamooli Shakhsiyat ke pesh-e-Nazar Ummat ke Zimmedar unhen dhoond kar Bai’at ke liye majboor karenge aur Bil-Aakhir Rukn-e-Yamani aur Maqam-e-Ibrahim ke Darmiyan Mehdi ka Aelania Zuhoor hoga, Baari Ta’ala un ke ird gird badal ke tukdon ki tarah Mukhliseen ko jama kardega aur Dekhte hi dekhte Haram me Imaan o Yaqeen ke mutawaliyon ka ek Samanda thathen maarne lagega.

Ye hai wo Aqeedah jis par Ummat pehli sadi hijri se Pandrahwi sadi tak Imaan rakhti aayi hai aur is taweel zamane me kisi bhi bhale Maans ne is me shak nahi kiya, Shakeel Mehdi ki Is Umoomi Marifat ka mazaaq udate hue likhta hai ke ummat ke ahle Haq  kya itne bewaqoof honge ke sabiqah ta’aaruf ke baghair kisi gumnaam ka daman fauran thaam len, aisa to Huzoor ﷺ ke sath bhi nahi hua, ek to Nabi se kisi Ummati ka mawazna hi jahalat ki alamat hai, phir wo is moti haqeeqat ko nahi janta ke Huzoor ﷺ ki Bi’sat but-parast mushrikon me hui thi aur wahan Mas’la Kufr chord kar imaan lane ka tha, jo Yaqeenan ek Mushkil cheez hai, jab ke Mehdi ke mukhataba Musalman hain aur wo bhi Ilm o Marifa ke buland maqaam par faayiz hain, is liye hukumat ke suqoot ke baad unhe is HASANI Nasab shakhsiyat se ziada Khilafat ke layeq koi dikhai nahi dega, wo Imaani firasat ki badaulat unhe pehchan kar fauran umoomi Bai’at ke liye majboor karenge is soorat me Ahl-e-Haq ki pesh qadmi khalis fitri aur mantaqi nazar aati hai aur asbaab ki roo se bhi hum waqiaat ke tasalsul ko ek fitri natija maanne par majboor hain, yahan Mehdi ko gumnaam aur pardesi qarar dekar ummat ke zimme daron ka mazaaq udana sarasar jahalat aur parle darje ki ayyari hai.

Shakeel Hindustan me paida hua hai aur Makkah jaakar Dawa karna us ke liye waqiatan Bhot bada dard-e-sar hai, isliye ek taraf usne Mehdi ke achanak Zuhoor ka inkar kiya to doosri simt mandarja zail do hadeesen pesh kar ke Imam ki Jala watni ka bada pur fareb afsana gadha hai.

ARBI HADEES

Hazrat Ali Razi Allahu anhu se riwayat hai ke Rasoolullah ﷺ ne farmaya ke Naher ke peeche se ek Shakhs ka Zuhoor hoga, jis ko Haris o Hiraas kaha jayega, uske lashkar ke sab se agle hisse par ek Shakhs nigraan hoga, jiska naam Mansoor hoga, wo Ahl-e-Bait ki isi tarah pusht panahi karega jis tarah Quraish ne Rasoolullah ﷺ ki pusht pinahi ki, har Musalman par uski madad karna ya farmaya uski hum nawai kare.[1]

Hazrat Abdullah farmate hain ke Hum Rasoolullah ﷺ ki Khidmat me Haazir the ke Achanak Hashmi Naujawan Ap ﷺ ke paas aaye unhe dekh kar Huzoor ﷺ ki aankhen Dabdabaa gayeen, Chehre ka rang badal gaya, farmate hain ke Maine Arz kiya ke Allah ke Rasool ﷺ kya baat hai ke Hum barabar Apke Chehre par aisa tasur mehsoos karte hain jis se hame takleef hoti hai, Huzoor ﷺ ne farmaya ke Hum Ahl-e-Bait hain, Allah ne hamare liye Dunya ke bajaye Aakhirat Muqaddar ki hai, Mere Ahl-e-Bait baad me Museebat o Jala watni se do chaar honge Yahan tak ke Aakhir me kuch log mashriq ki taraf se aayenge jinke Jhande kale honge, wo Khair ke mutalashi honge, lekin wo Unhe nahi di jayegi to phir wo Qitaal karenge aur Hasb-e-Zaroorat unki madad ki jayegi, lekin wo Iqtedaar ko qabool na karenge yahan tak ke Unke Jhando ko mere Khaanwade k eek Shakhs ke Supurd kardenge wo Dunya ko Insaaf se is tarah bhar dega jis tarah Logon ne Use Zulm se bhar diya tha, agar tum me se koi bhi us Ahed ko paaye to un logon ke paas Zaroor pohanche Khwah use Baraf par Ghasit kar hi kyu na jaana pade.[2]

Raawiyon ke mazboot hone ke sath Hadees ki Sehat ke liye Sanad ka Muttasil hona bhi Zaroori hai agar dono me se koi Ek Shart bhi mafqood hogi to riwayat Kamzor qarar payegi.

Mandarja Zail baala Hadees me 2 Khamiyaan hain, Ek Sanad me, Doosri Rijaal me.Daswin Sadi Hijri ke Mashhoor Muhaddis Imam Munzari rah. ne ise Munqate qarar diya hai[3] yani Sanad Muttasil nahi hai, is ki koi Kadi Ghaib hai, jab ke Rawiyon me Abul Hasan Koofi aur Hilal Bin Amr koofi dono majhool hain, Muhaddiseen inhe jaante tak nahi, phir Is ka Mazmoon bhi Zof(kamzori) ki shahadat deta hai. Quraish ne Huzoor ﷺko  kabhi panah nahi di, wo to Shuru hi se Ap ﷺ ki Mukhalifat par utre, Ilzaamat lagaye, Be Rehmi se sataya, Qatal ki sazishen ki aur 8 Saal tak jungen laden, Moti si baat hai agar Quraish Huzoor ﷺ ko panah dete to Ap ﷺ ko Makkah chord kar Madeena Hijrat kyu karni padti, Al Gharz riwayat o Dirayat dono aetebaar se Hadees Mustanad nahi aur na hi is se SHAKEEL ki bakwaas ki koi Tayeed hoti hai.

Jabke Doosri Hadees Sanad o Matan ke aetebaar se ziada kamzor nahi, lekin isme bhi pehle to Ahd-e-Risalat ke baad Ahl-e-Bait ki pareshanion ka tazkira hai, phir ek qaum ka mashriq se aakar ladne ka Huzoor ﷺne zikr kiya aur Saaf batlaya ke wo log Fateh o Nusrat ke bawajood khud Hukumat Qabool nahi karenge, balke ye Amana two Imam Mehdi ko sonpenge goya ye Fatiheen Zaroor Mashriq se aayenge lekin Imam Mehdi Hijaz hi me honge, Hadees me koi ek Lafz bhi aisa nahi milta jis se ye sabit ho ke Musalman Imam Ko Jalaa watan kardenge. Qaraeen riwayat par dobaara nazar daalen to wo Be-Saakhta is Natije par pohanchenge ke Yahan aisa koi Tazkira nahi aur Shakeel Saaf Jhoot bol raha hai, ye Shakhs Bharat me paida hua aur Yahin palaa badha aur Yahin Qiyaam pazeer hai to wo Jala Watni ka shosha chord kar Aakhir kya sabit karna chahta hai, Kya wo Hijaaz me paida hua tha jo Use Jala Watan kardiya gaya, Shakeel Bataye ke ise kisne jala watan kiya aur kab kiya?

Shakeel ne Hindustani Paidaish o Rihaish ko zabardasti Jala Watni ka naam dekar apne Mureedon se Wa’da kiya tha ke 2009 me 40 Saal ki Umar hone ke baad wo 313 Chelon ko lekar Hijaaz ka safar karega, phir Makkah me Uski Mehdawiyat ka Aelaan hoga aur poori Dunya me Shakeel ki Hukumat qayem hojayegi, use Andaza tha ke waqt kitni tezi se guzarta hai, Chunanche Mazkoorah Saal ne jab uske Darwaze par dastak di to wo buri tarah bad hawaas hogaya, Qadiyani ki tarah Jhooti peshan goiyan shuru kardeen aur Hijaz rawangi ko do-ek saal nahi usne poore 24 saal  aage badha diya, kyun ke Makkah ka safar bada jokham bhara hai aur use khoob maloom hai ke Saudi Hukumat Hindustani Kazzab ka sar bhi usi talwaar se kaat degi jisse 1981 me Usne Qahtani Kazzab ka sar kata tha is liye Shakeel sardast koi Khatrah mol lene ke Mood me nahi hai aur 2033 tak wo safar ka tazkira bhi nahi karna chahta.

[1] Abu Dawood

[2] Sunan Ibne Maja

[3]

Advertisements

One thought on “ALAAMAATE MEHDI KI RAUSHNI ME SHAKEEL KA POST-MORTEM:5”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s