Kazzab Shakeel ka Maseehiyat ka dawa

Maseehiyat ka dawa:

Lekin In tamam shikaston ke bawajood Shakeel ko na sirf koi nadamat nahi balke wo Mehdawiyat ke baad Mazeed hat dharmi ka muzahera kar ke Maseehiyat ka dawa bhi kar dalta hai, uska kehna hai ke Meri apni Rooh to kabhi ki nikal chuki, ab mere jism me Hazrat Eisa alaihis salam ki Rooh kaar farma hai aur Mai Mehdi ke sath Maseeh bhi hoon, Hamare nazdeek ye Shakhs kisi Hindu Tastaai Taaqat ka agent hai, jabhi to un ke Baatil Aqeede ki tableegh kar raha hai, Haalanke Islam Aawakon ko tasleem nahi karta aur Quran o Hadees ki roo se ye bilkul Mushrikana Aqeeda hai. Hamare paas Saheeh Ahadees ki ek bhot badi tadad maujood hai jo sarahatan Hazrat Eisa Alaihis salam ke aasman se utarne ki mukammal sarahat karti hai aur unki Rooh ke Doosre ke Jism me Hulool karne ka riwayaat me koi Mamooli ishara bhi nahi milta, Yaqeenan ye aisa Jhoot hai jise Shakeel Qayamat tak sabit nahi karsakta.

Shakeel ne Maseeh o Mehdi ko ek hi shakhsiyat qarar dene ki koshish ki hai, Haalanke Dunya jaanti hai ke Hazrat Eisa Alaihis salam ka Nasali talluq Bani Israil se tha aur wo Muhammad ﷺ se 600 saal Qabl Phalastene me paida hue aur Yahood ke narghe se bacha kar Unhe Aasman par utha liya gaya, jab ke Imam Mehdi Huzoor ﷺ ke khandan ke fard hain aur Aapki wafaat ke Sadiyon baad wo Dunya me paida hokar Makkah Mukarrama me Zaahir honge to dono ke Darmiyan kam az kam 2000 saal ka lamba arsa hai, Ab Shakeel bataye ke wo ek kis tarah hosakte hain???

Usne لا المھدی الا عیسیٰ بن مریم se daleel pakadne ki koshish ki hai Haalanke wo Ilm-e-Hadees se agar zara bhi waqif hota to ye himaqat hargiz na karta, kyunke kisi bhi riwayat se istedlal usi waqt durust hota hai jabke wo Sanadan Mazboot ho aur uske ma’aani o mataalib me koi ahtemaal na ho, yahan dono sharten mafqood hain, na Riwayat mazboot hai aur na hi mafhoom Qat’ayyud dalalat hai, ek raawi Muhammad Bin Khalid Jundi Ghair Maroof o Majhool hain, yani Muhaddiseen unhe jaante tak nahi, aisa raawi Qaabil-e-Aetemad nahi hota hai aur uski riwayat kamzor thairti hai, Yahi wajeh hai ke mazkoora Hadees ko Imam Hakim, Shaikhul Islam Ibn-e-Taimiya, Hafiz Zahbi, Mulla Ali Qaari, San’aani,Shaukani aur Albaani waghaira jaise Buland paaya Ulama ne Mauzoo qarar diya hai.

Lekin Sanad ki Kamzori se hum agar chasham poshi bhi karen to bhi uska mafhoom shakeel ke dawe ki tasdeeq nahi karta aur wo is haqeeqat ki taraf ishara karta hai jis par Mujaddid-e-Millat Hazrat Maulana Ashraf Ali Thanwi rah ne “مواخذۃ الظنون عن کلام ابن خلدون” me raushni daali hai, wo farmate hain ke Yahan Maseeh o Mehdi ke zamane ki qurbat ki takeed hai yani jaise hi Maseeh Dunya me zaahir honge fauran Hazrat Eisa alaihis salam aasman se utar aayenge, Kalaam-e-Arab me ye Usloob pehle se raaij hai aur Lafz Mehdi ka Hadees me Marifah ki soorat me aana bhi isi ki daleel hai, Arbi Zaban se waqfiyat rakhne wale Hazraat ise achi tarah samajh sakte hain.

KHWAAB SE ISTEDLAL:

Riwayat o Dirayat ki Roo se Hadees ki tashreeh ke baad Shakeel ke paas iske siwa koi chaara nahi raha ke wo Daleel ki talash chord de aur koi Adang badang haan kar aage badh jaye, chunanche usne apne ek mureed ko fauran khwab dekhne ka hukum diya, ab jaisa Peer waisa Mureed, Jab Guru Dhardle se Jhoot bol raha hai to Chela peeche kyu rahe, wo raat ko soya aur Subah Aelan kardiya ke Rasoolullah ﷺ ne mujh se Khwab me farmaya لا المھدی الا عیسیٰ بن مریم ki Hadees Saheeh hai, Lekin afsos Meri Ummat ise nahi maanti, lijiye Qissa tamam hua, jo kaam daleel se hota wo usne Khwab se kar dikhaya, koi is Jaahil se pooche ke wo kya Dunya ki kisi adalat me Khwab ki bunyad par koi Muqaddama lad sakta hai? Aur kya Judge bhi is Khurafati daleel ko tasleem karega? Agar nahi to phir ye Bhonda mazaaq wo Deen o Shariyat ke sath kyu kar raha hai? Kya Aqal bilkul hi maari gayi ya Wo Ummat ki aankho me yun Dhool jhonkna chahta hai.

Hadees ki Sehat ka faisla agar Khwabon se hota to Ulama Sanad aur Rawiyon ki tehqeeq me itni Mehnat kyu karte? Bus do chaar khwab dekh lete aur ba-aasani tamam riwayaton ki Sehat aur Kamzori ka Faisla hojata, lekin lagta hai ke ye Gur to bus Shakeel hi ko aata hai, isi liye wo Be Khuaf hokar khuli Dhaandli par aamada hai, agar usme Himmat hai to Neend se bedaar hokar Din ki Raushni me aaye aur koi ek aisi Hadees pesh kare jo uske Dawe ki sarahatan tasdeeq karti ho, Hamara Challenge hai ke Shakeel Qayamat tak aisa nahi karsakta, kyunk e Hadees  ke Zakheer me aisi koi riwayat maujood nahi, Haan Uske Bar-Aks aisi Be Shumaar Ahadees maujood hain jo Saaf batati hain ke Hazrat Eisa Alaihis Salam Bani Israili Nabi the, wo Huzoor ﷺ se 600 saal pehle Mab’os hue aur ab Qayamat ke qareeb Dunya me Dubara Aasman se utrenge, jab ke Imam Mehdi Khud Huzoor ﷺ ki Aulaad me paida honge aur un ka Zamana Khatim-ul-Nabiyyeen ﷺ ki Bi’sat ke bhi Sadiyon baad ka hai, to kul milaa kar dono ki wiladat hi me kam az kam 2000 saal se zaayed ka fasla hogaya, Ab Shakeel bataye wo Dono Aakhir kis tarah ek Shakhs qarar diye jasakte hain.

Advertisements

One thought on “Kazzab Shakeel ka Maseehiyat ka dawa”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s