Maseeh-e-Kazzab Shakeel Bin Hanif ki Kitab ka Jayeza

GUMRAH KUN KITAB AUR USKA MUKHTASAR JAYEZA:

Chand Saal Qabl Delhi ke baaz Ulama ne hame is fitne ki taraf Tawajjah dila kar Uske fauri taqub ka mashwara diya tha, Lekin Musannif ne Amadan Kuch bhi likhne se Gurez kiya kyunke Aise Gumnaam logon par Khaama fursai basa auqaat unhe ta’aruf o Shohrat ki bulandiyon tak pohancha deti hai, jis se faida kam Nuqsan ziada hota hai, lekin Maharashtra ke Ghairat mand Musalmano ke khat ke baa dab chasham poshi munasib nahi, aur aisi Mukhtasar tehreer ki shaded Zaroorat Mehsoos hoti hai jo tamam Ghalat Fehmiyon ka pardah Chaak kar ke Shakeel Bin Hanif ki Haqeeqat aur Uske Fraud ko poori tarah aashkara karde, Chunanche Hum sab se pehle Uske Kitabche par nazar daalte hain jo kayee saal qabl manzar e Aam par aaya hai, 88 Safhaat par Mushtamil us risale ka Unwaan “Mehdi Alaihis Salam ki Aamad ki Peshan goiyan”. Shakeel Bin Hanif ne isme apne Dawe ko sabit karne ke liye Ayyarana Guftgu ki hai jo Ahle Ilm ke liye Khwah Muzir na ho, Lekin Saadah Lauh Musalman to Use padh kar Zaroor Chakma kha jaayenge, Isliye Qaraeen Ko hum Us ka sarsari Mutala’a karana chahte hain, phir Imam Mehdi ki Alamaat ki raushni me Shakeel Bin Hanif  ka postmortem kiya jayega.

Mazameem ki Chori :

Nabuwwat o Wilayat ka dawa karne walon ki babat Tareekh batati hai ke wo Dalail ko Gadhne me itne Jari o Be-baak hote hain ke na sirf Khuli Khayanat karte hain, Balke Aayaat o Ahadees ko jaan boojh kar aise Ghalat maine pehnate hain ke Dil dehal jata hai aur Dar lagta hai ke Deen se is Khilwaad ki padaash me kahin sab par Allah ka Azaab na aajaye, Shakeel Bin Hanif bhi kyunke Isi Makkar toley ka fard hai is liye Hath ki Safai me wo kyun doosron se peeche rehta, Chunanche hum ne jab uski kitab padhna Shuru ki to maloom hua ke wo Ghulam Ahmed Qadiyani ka Sacha Janasheen hai, Wahi Adayen, Wahi Ayyari, wahi Jhoot, Wahi Kizb Bayani, Al Gharz har baab me wo us ke naqshe  Qadam par chalta nazar aaya, Unse 88 Hadeeson me se 90% Hadeesen Raqim ul Huroof(Mufti Asad Sambhali db) ki kitab “IMAM MEHDI SHAKHSIYAT O HAQEEQAT” se naqal ki hain aur tarjuma tak taqreeban wahi hai, lekin Khayanat dekhiye ke kahin hamara hawala nahi deta, aur Zaalim is tarah Qalam chalata hai goya khud Mutalaa kar ke usne ye Hadeesen Daryaft ki hon, Shuru me to hum ne Sirf andaza hi lagaya tha, lekin baad me uske hath par Bai’at karne wale ek Saheb Baraah-e-Rast hame Ittela di ke unho ne khud Hamari kitab uski mez par dekhi hai, aur wo Ahadees Umooman usi se Code kar ke Apne Naam se Shaya karta hai, Kisi Musannif ki Kitab se sab kuch lekar bhi Uska Hawala na dena Ilmi Sarqa(Chori) hai, jiska Irtekaab Shakeel Bin Hanif jaise Be Sharam log hi karsakte hain.

Mutlaqul Ananiyat:

Ahle  Tasneef Quran o Sunnat ke dalail ke baad Shahadat ke taur par Umooman Akaabir Ulama ke Hawale bhi pesh karte hain take unka Mauquf Maqool nazar aaye aur Qarayeen ko Phir uski Sadaqat me koi Shubah na ho, Taqreeban tamam Baatil Firqon ne isi Ilmi Tarz ka Istihsaal karne ki koshish ki hai, go wo apne Maqsad me kamiyaab na hosake, Lekin Shakeel Bin Hanif Deen o Shariyat me Khud ko Mutlaq-ul-Anaan samajhta hai, Isliye 46 Ahadees Naqal karne ke bawajood usne Ummat ke kisi ek Shareh ya Aalim ka naam tak lena gawarah nahi kiya aur har jagah aisi Hakimana Guftgu ki hai goya Allah o Rasool ke baad wahi bas sab se badi Authority hai, Qaraeen Andaza lagayen ke Shakeel Bin Hanif kis Darjeh Ghamandi aur Mutakabbir hai aur Shaitan is par kis Tarah haawi hochuka hai.

Chaudah(14) Sadiyon ke Ulama ki Tauheen:

Mehdawiyat ka Roop bharne wale Ulama ki Baseerat o Khidmaat ka Kulyatan Inkaar karte hain, taake Unki Ibaraton ko pesh kar ke in Na Khuda tarson ke Daawe ka Rad na kiya jasake, Chunanche Shakeel Bin Hanif Apni Kitab me Isi Dagar pe chala hai, Wo Qaraeen ko Ja bajaa ye Tasur deta hai ke Rasoolullah ﷺ Ki peshangoiyaan Bhot Ganjalak aur pechidah hain aur Unhe Chauda Sadiyon(14 Centuries) tak Ummat ka koi Aalim Samajh bhi na saka hai, Ab Unke Fahem o Shaoor ka Malikah Allah ki taraf se Bas Shakeel Bin Hanif ko Ata hua hai, Isliye WO Mehdi ki babat jo kuch Bakk raha hai wo Quran o Hadees ki tarah Atal hai aur Use Challenge karne ki kisi ko Ijazat nahi. Qaraeen Zara Ghaur to Karen ke jin Aslaaf o Akaabir ne Quran o Hadees ke samajhne me apni poori poori Zindagiyan waqf kardeen, wo to sab milkar bhi Huzoor ﷺ ki peshangoi na Samajh sake aur Shakeel Bin Hanif Inhi Ulama ki tehreeren padh kar sab kuch samajh gaya, Haalanke na Usne Kahin Deeni Taleem Haasil ki hai aur Na hi Use Arabi Zaban ki koi ShudBud hai, Ye Buland Baang Dawe hi Darasal Qaari ko Uski Jahalat aur Gumrahi ka Yaqeen dilate hain.

Dhaandli Ka Muzahera:

Mehdawiyat ka Dhong karne wale Un Ahadees ko Jhutlana bhi zaroori samajhte hain jo un ke Makr o Fareb ke parde Chaak kar ke masle ko poori tarah Munaqqah (Saaf) kardeti hain, Shakeel Bin Hanif bhi Qadiyani ki tarah khud ko Asal Miyaar samajhta hai, Isliye Riwayaat ke sath usne bhi wahi Khilwaard kiya jo uske Peshroo Maazi me karchuke hain, Saheeh Hadees ko Zaeef kaha aur Zaeef o Mauzoo riwayaat usne Be Dhadak Mustanad qarar deaden, Aur yahan tak Likhdiya ke Jo Alamaat uski zaat par Muntabiq horahi hain unhen to Tasleem kiya jaye aur Jo Uske Khilaaf padti hain unhe rad kardiya jaye, kyunke Hadeesen Shakeel ki paband hai, Shakeel Hadeeson ka nahi. Ye Gumrahi ki Aakhri had hai aur yahan tak pohanchne ke baad bhot kam logon ko wapsi ki taufeeq milti hai.

Yahood o Nasara ki Bar’aat:

Alamaat-e-Mehdi ko Na Qaabil e Fahem bana kar Shakeel Bin Hanif ne un tamam Peshangoyion ko bhi Mutlaqan Ganjalag pechida qarar de daala, jo Rasoolullah ﷺ ki Bisat se Mutalliq Taurait o Injeel (Bible) me mazkoor theen, Uska kehna hai ke Yahood o Nasara Unhe kamaa Haqqahu na samajh sake aur Adme Marifat ki Bina par wo Bil Aakhir Imaan se Mehroom rahe. Qaraeen! Zara Ghaur farmaayen ke wo Kitni Khoobsoorti ke sath Unke Bughz o Inaad ki taujeeh kar ke Adm-e-Marifat ka shosha Chord raha hai, Haalanke ye Nazarya Quran o Hadees ki Sareeh Mukhalifat karta hai, kyunke ye Peshan goyian agar Itni hi Mubham aur pecheedah hain ke unka Misdaaq kisi ki samajh me hi nahi aata to phir aisi paheliyon ka faida hi kya hai aur Kya is tarah ki paheliyan bujhana Ambiyaa ki Shayaan-e-Shaan hai? Nahi, Balke wo to parda Ghaib me chupe waqie ki taraf itna wazeh Ishara karti hain ke Uska Zuhoor hote hi Ahle Ilm fauran samajh jaate hain, aur phir kisi ko bhi iski marifat me Shubah nahi rehta. Quran ne Huzoor ﷺ ki baabat Aelaan farmaya “يَجِدُونَهُ مَكْتُوبًا عِنْدَهُمْ فِي التَّوْرَاةِ وَالْإِنْجِيلِ” (Surah A’raaf:157) yani WO Nabi Ummi ki Shakhsiyat ko Apni Taurait o Injeel me Likha hua paate hain, Yahan Maktoob lafz istemal kiya gaya jiske Maine hi ye hain ke Huzoor ﷺ ki tamam tar alamaat aur Mukammal Sarapaa Aasmani kitabon me darj tha, Chunanche Jab Ap ﷺ ki bi’sat hui to kya Badshah aur kya Ri’aaya aur Kya Ulamaa aur kya Awaam, kisi bhi Sahib-e-Nazr ko pehchaanne me Diqqat na hui, Habshah Ka Badshah Najashi to Mahez alamaaten sun kar hi Imaan le aya, Rumi Saltanat ke badshah Hiraqal ne Bhare darbaar me Ap ﷺ ki Nabuwwat o Risaalat ka Khul kar Aetraaf kiya, Abdullah Bin Salaam Razi Allahu anhu Yahoodi Aalim ne bhi Ap ﷺ ko Dekhte hi Nabuwwat ki Tasdeeq kardi aur Salman Farsi Razi Allahu anhu Ne Rahibon ki Ata karda Nishanion ki Raushni me Jayeza liya aur Wo Bhi Faurad Hi Musalman hogaye, Inke Ilawa Baqiyah Ahl-e-Kitab ka Haal wo tha jisse Ummul Momineen Hazrat Safiyyah Razi Allahu anha ne parda uthaya hai, farmati hain:

“Jab Rasoolullah ﷺ Madeene me tashreef laaye to Mere Baap aur Chacha( jo Dono Bade Yahoodi Alim the) Ap se milne pohanche, bhot der tak guftgu ki, phir jab Ghar wapas hue to dono ke chehre Faq the, Mai kaan lagakar Dono ki Guftgu suni.

Chacha: Kya waqai ye wahi Nabi hai jis ki Bi’sat ki Khabr Hamari Kitabon me di gayi hai?

Walid: Khuda Ki Qasm wahi hai.

Chacha: Kya tum ko is ka poora yaqeen hai?

Walid: Haan! BaKhuda(Khuda Ki Qasam) poora Yaqeen hai.

Chacha: Phir AB kya irada hai?

Walid: Jab tak jaan me jaan hai Mai Mukhalifat karunga aur uski baat kisi Soorat chalne Na doonga.(Ibne Hisham 2/165)

Ye Waqiaat batate hain ke Pichli Kitabon me Rasoolullahﷺ ki Alamaat itni Wazeh aur Mukammal theen ke Huzoor ﷺ ki Bi’sat ke waqt Ahle Kitab ko pehchaanne me koi Dushwari nahi hui aur Quran ki Sarahat ke mutabiq wo Nabi ki Zaat aur Us par Naazil hone wali kitab ki aisi hi Marifat rakhte the jaisa ke Koi Shakhs Apni Aulaad ki rakhta hai” يَعْرِفُونَهُ كَمَا يَعْرِفُونَ أَبْنَاءَهُمْ “(Surah Baqarah: 146). Ab Qaraeen Faisla Karen ke Shakeel Bin Hanif Yahood o Nasara ki wakalat kar ke Unke Bughz o Inaad par kyun parda daal raha hai?Kahiin ye Kisi Khufya Taal Mel ka natija to nahi hai?

Shaitani Raoonat:

Kitab ke Mutali’e ke dauraan Ek Ehsaas Qaari ko ye hota hai ke Iske Musannif par Ek Shaitani Dhun sawaar hai aur wo Ba har soorat apna Mudda’aa Saabit karne par tula hai, Khwah Qurani Aayaat ya Ahadeese Rasool se use kitna hi khilwaard kyun na karna pade, Chunanche Dalail ki talash me usne na sirf Be Aqli ka Muzahera kiya balke Aisi Sareeh Himaqat tak kar gaya jise Aam Qaari bhi Nazar Andaaz nahi karsakta, Maslan Imam Mehdi ke Zuhoor se pehle Wafaat paane wale Hakim ko wo Hazrat Maulana In’aamul Hasan Kandhalwi Nawwarallahu Marqadahhu qarar deta hai, Jabke Daryaa-e-Furaat se Nikalne wale Son eke Khazane se Markaz Nizam Uddin ki Imarat murad li aur Uski Khaatir Jung ladne wale Use Hazrat Maulana Izhaar-ul-Hasan Kandhalwi Rah., Hazrat Maulana Zubair Sahab damat barakatuhum[1] aur Hazrat Maulana Muhammad Saad Sahab Kandhalwi Madda Zilluhul Aali ki Soorat me Nazar aaye.

Qaraeen Khud Faisla Karen ke Hadeeson ka Agar aisa hi man-chaaha Matlab liya jaye, to phir ye Alamat hare k par Fit hosakti hai aur Dunya ka Har Shakhs Imam  Mehdi ban sakta hai, Yaqeena ye aisi bachkana Harkaten hain jinki tardeed ki bhi zaroorat nahi aur unhe Zaban par lane ki koi Aqalmand to himmat bhi nahi karsakta, lekin Daur-e-Haazir ka Almiya dekhiye ke Shakeel Bin Hanif Is tarah ki bakwaas likh kar chaap raha hai aur log uske naam ka Kalima padh rahe hain, Maulaa!! Ab Tu hi is deen ka Muhafiz hai.

Gumrahi ki Saudagiri:

Mehdawiyat ka Dawa karne walon ki Lambi qataar me in Hazraat ki tedad bhot kam hai jo waqiatan kisi Ghalat Fehmi ka Shikaar hokar raah-e-Rast se bhatak gaye, Unme Aksariyat aisi hi Na Khuda taras logon ki hai jinhon ne Dunya ki Khaatir kaj rawi Ikhtiyaar ki aur Jaan Boojh kar saada Lauh Musalmano ko Gumrah kiya, Shakeel Bin Hanif bhi Isi Tabqe se Talluq rakhta hai, Use koi Ghalat Fehmi hai aur na hi kisi Hadees se Dhoka laga hai, Balkeh Ek Munazzam Plan ke tahet wo ye Khatarnaak Muhim chala raha hai aur Qadiyanio ki tarah uska Maqsad bhi Ummat-e-Muslima ko gumrahi ke Sehraa me Bhatkaa kar Milli Ittehad o Shaukat ko paara paara karna hai, Hame Un Ahl-e-Nazar ki raaye kaafi durust maloom hoti hai jo ye samajhte hain ke Shakeel Batil ka Agent hai aur kisi Mawaraai taqat ke Ishare par hi wo ye sara khel khel raha hai.

Ye the wo tasuraat jo Mudda’ee Ki Kitab padh kar Be Saakhta Zahen ke parde par Namoodar hue aur hum ne Be Kam o Kaast unhe Shuru hi me naqal karna zaroori samjha, take Qaaraeen in Nukaat ki Raushni me jab Hamara tajziya padhen to Haqeeqat ke Idraak me koi Dushwari na ho aur Masla Poori tarah Munaqqah[2] hokar unke saamne aajaye, Us waqt  unhe andaaza hoga ke Shakeel Bin Hanif koi Naya Fitna nahi balke usi gumrah Tabqe ka ek Fard hai jo Tareekh ke Har daur me Fasaad machaane ke liye utha aur Khudaai Maar kha kar wo zamane ki Silwaton[3] me gum hogaya, Un Na Khuda Tarson ke paas na kal koi daleel thi aur na hi aaj koi Hujjat hai, Bas Ahadee ko tod marod kar wo apne Mauquf par istedlal ki Narawaan[4] koshish karte hain, Maazi ki tarha Daur-e-Hazir me unka ye khel jaari hai aur Zamane ki Taweel masafat bhi unke tareeqe me koi Tabdeeli paida na karsaki, wahi Dhaandli, Wahi Makr o Fareb, Wahi Tehreef, Wahi Hat Dharmi aur Aankho me Dhool jhonkne ki wahi Ayyarana[5] koshishen, ALgharz sab kuch wahi hai bu Pardae Semeen ke kirda badal gaye hain.

“SIRF JAAM BADLE HAIN MAI[6] WAHI PURANI HAI”

[1]

[2]

[3]

[4]

[5]

[6]

Advertisements

3 thoughts on “Maseeh-e-Kazzab Shakeel Bin Hanif ki Kitab ka Jayeza”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s