Taaruf Shakeel Bin Hanif

Shakeel Bin Hanif ka  Taaruf

Shakeel Bin Hanif jisne 2 daawe kiye hain ke wo Hazrat Mehdi hai (jinke Qayamat ke qareeb Zuhoor ki tafseel ahadees e mubaraka me aayi hai aur un ahadees me Hazrat Mehdi ke Aale Rasool ﷺ me se hone ki wazahat aur Madina Munawwara ke Bashinde hone ki tafseel hai, aur unka Zuhoor Makkah Mukarrama me hoga manqool hai, sab se Ahem ke unka Zuhoor hoga wo dawa nahi karenge) aur wahi Hazrat Eisa Bin Maryam alaihis salam hai kehta hai. Uska Taruf aur uske daawon ka tajzya ba Qalam Hazrat Maulana Shah Alam Gorakhpoori (damat barakatuhum)

Daure Hazir ka Muddaiye Mehdawiyat o Maseehiyat SHAKEEL BIN HANIF ek Ta’aruf wa Tajziya

Read Online

Download

Shakeel Bin Hanif jisko uske maanne wale Hazrat Ji Md Shakeel Bin Hanif kehte hain ke baare me tamam tafseelaat jaanne ke liye yahan click karen.

Advertisements

Jaago Zamana Chaal Qayamat Ki Chal Gaya

Jaago Zamana Chaal Qayamat Ki Chal Gaya

Tehreeri Khitaab/Bayan

Mohtaram Hazraat!

Is Waqt Aap Hazraat Se Ek Mukhtasar Aur Zaroori Guftagu Karni Hai, Isliye Darkhast Hai Ke Isey Gaur Se Sune.

Aap Hazraat Ke Ilm Me Hoga Ke Ab Se Taqreeban 125 Saal Pehle Mirza Ghulam Ahmad Qadiyani Naam Ke Ek Shaks Ne Apne Baare Me Kuch Daawa Kiya Tha. Usne Pehle Kaha Tha Ke Woh Hi Wahi Mehdi Hai Jinke Aane Ki Peshangoi Rasooullahﷺ Ne Farmayi Thi. Phir Usne Daawa Kiya Tha Ke Rasooullah ﷺ  Ki Bohat Si Ahadees Me Bataya Gaya Hai Ke Aakhir Zamane Me Hazrat Isa Maseeh Aayenge, Main Hi Wo Isa Maseeh Hoon Aur Iske Baad Usne Apne Nabi Hone Ka Daawa Kar Diya Tha. Us Waqt Se Le Kar Aaj Tak Ke Tamam Ulama Usko Gumrah Aur Kaafir Maante Aayen Hain.

Ab Se Kuch Saal Pehle Shakeel Naam Ke Ek Shakhs Ne Bhi Isi Tarah Ke Daawe Kiya Hain. Yeh Shakhs Bhi Apne Aap Ko Mehdi Aur Maseeh Kehta Hai Aur Is Tarah Ek Nayee Gumraahi Aur Ek Naya Fitna Wajood Me Aaya Hai. Is Nayee Gumraahi Ki Dawat Dene Waale Log Hamari Masjido Me Namaz Padh Rahe Hain Aur Hamare Seedhe Sadhe Naujawano Ko Behkaane Ki Koshish Kar Rahe Hain. Unhone Apni Sooraten Bohat Deendar Naujawano Ki Si Bana Rakhi Hain Taaki Logon Ko Aasani Se Dhoka Diya Jaa Sake. Wo Bohat Khufiya Taur Par Hamare Kisi Naujawan Se Milte Hain Aur Use Jhoote Shakeel Se Bait Karne Ke Liye Kehte Hain. Inlogon Ka Tareeqa Ye Hai Ke Ye Kehte Hain Ke Jis Dajjal Ke Aane Ki Khabar Hazrat Muhammad Rasooullahﷺ Ne Di Thi Wo Aa Chuka Hai Aur Phir Us Se Ye Kehte Hain Ke Dajjal Ke Baad Mehdi Aur Maseeh Ko Aana Tha Aur Wo Bhi Aa Chuke Hain Aur Ab Unke Hath Par Bait Karna Zaroori Hai. Kyunki Apne Apko Mehdi Aur Maseeh Kahne Waala Shakeel Bohat Badnaam Ho Chuka Hai Isliye Kisi Ko Yeh Shakeel Ka Naam Nahi Batate. Agar Koi Unse Puchta Hai Ke Ye Tumhare Mehdi Aur Maseeh Kahan Rahte Hain? To Ye Usko Saaf Jawab Bhi Nahi Dete, Bas Yahi Kehte Jaate Hain Ke Pehle Bait Ho Jayen Phir Batayenge.

Mere Bhaiyo Aur Buzurgo! Ye Ek Badi Gumraahi Aur Fitna Hai. Is Shaks Ke Daawe Ke Jhoote Hone Me Kya Shak Hai? Ahadees Se Maloom Hota Hai Ke Mehdi Aur Maseeh Alag Alag Shaksiyaat Hain Aur Shakeel Kehta Hai Ke Main Ek Sath Mehdi Bhi Hoon Aur Maseeh Bhi. Yeh Kaise Ho Sakta Hai?

Hazrat Mehdi Ke Baare Me Hadees Me Bataya Gaya Hai Ke Woh Rasooullah ﷺ  Ki Nasal Se Honge Aur Hazrat Isa  (عليه السلام) Ke Baare Me Aap Sab Jaante Hain Ke Woh Bani Israil Ki Nasal Se Talluq Rakhte Hain. Shakeel Na To Bani Israil Ki Nasal Se Hai Aur Na Rasooullah ﷺ  Ki Nasal Se, Ye To Darbhanga, Bihar Ke Ek Hindustani (Khan) Khandaan Se Hai. Phir Ye Kaise Apne Aap Ko Mehdi Aur Maseeh Keh Sakta Hai?

Hadison Se Saaf Taur Par Maloom Hota Hai Ke Mehdi Aur Maseeh  (عليه السلام)  Aane Ke Baad Khuli Zindagi Me Rahenge Aur Shakeel Chuphta Phir Raha Hai.

Hadeeson Se Ye Bhi Maloom Hota Hai Ke Hazrat Mehdi Aur Hazrat Maseeh Dono Waqt Ke Zaalimo Ke Khilaf Jihad Karke Unhe Shikast Denge Aur Apni Hukumat Qayem Karenge. Aisa Karna To Door Ki Baat, Shakeel Iska Khwab Bhi Nahi Dekh Raha.

Phir Shakeel Bohat Badtameez Qism Ka Aadmi Hai. Jis Zamane Me Woh Delhi Rehta Tha Uske Waalid Us Se Milne Aaye To Usne Unke Sath Bohat Badtameezi Ki Aur Gaaliyan De Kar Unko Bahar Nikal Diya. Kya Aise Kirdaar (Character) Ka Aadmi Mehdi Aur Maseeh Ho Sakta Hai?

Mere Mohtram Bhaiyo! Ek Baar Main Phir Arz Karunga Ke Is Shakeel Ki Dawat Dene Waale Log Iska Naam Shuru Me Nahi Batate Hain. Isliye Agar Koi Aapse Ya Aapke Kisi Janne Waale Se Baat Kare Aur Ye Kahe Ke Dajjal Aa Chuka Hai Aur Mehdi-Maseeh Bhi Aa Chuke Hain, Chaliye Unke Hath Par Bait Ho Jayen, To Samajh Lijiye Ke Wo Aapko Usi Jhoothe Shakeel Ki Dawat De Raha Hai Aur Aapko Gumraah Karna Chahta Hai, Isliye Us Se Khud Bhi Bachiye Aur Apne Janne Waalo Ko Bhi Bachaye.

 

-Maulana Ilyas Nomani Db

Shakeeli Fitne Ka Muqabla Kaise Karen

Is Fitne Ka Muqabla Kaise Karen

Ye Fitna Kyunki Bohat Raazdaari Ke Sath Phailaya Jaa Raha Hai Isliye Aam Taur Par Jab Kisi Ilaqe Ke Deen Ki Fikr Rakhne Wale Musalmano Ko Apne Ilaqe Ke Baare Me Pata Chalta Hai Ke Hamare Yahan Is Fitne Ke Parcharak Active Hain, To Us Waqt Tak Bohat Der Ho Chuki Hoti Hai Aur Kayi Naujawan Uski Bhent Chadh Chuke Hote Hain. Delhi, Bihar, Maharashtra, Telangana, Andhra Pradesh Aur Up Ke Sath Sath Mulk Ke Jis Hisse Me Bhi Is Fitne Ki Activities Ki Aaj Ittela Hai Unn Tamam Muqamaat Par Khadiman-E-Deen Ko Jab Is Fitne Ki Activities Ka Pata Chala To Kaafi Der Ho Chuki Thi, Isliye Kisi Bhi Ilaaqe Me Is Intezar Me Nahi Rahna Chahya Ke Jab Hamare Yahan Fitne Ki Khabar Milegi To Phir Fikar Karenge. Isliye Ke Mumkin Hai Ke Kisi Ilaqe Me Ye Active Ho Aur Hamen Iski Khabar Na Ho.

Soorat-E-Haal Ki Khatarnaaki Ka Is Se Andaza Kijye Ke Jin Ilaqon Ke Silsile Me Ye Itminaan Tha Ke Yahan Ye Fitna Maujood Nahi Hai, Wahan Ki Masjidon Me Is Masle Par Guftagu Hui To Kuch Naujawano Ne Inme Se Kuch Masjido Ke Aemma Ko Bataya Ki Us Tarah Ke Logon Ne Humse Bhi Rabta Kiya Hai. Is Liye Zarurat Is Baat Ki Hai Ke Kisi Bhi Ilaaqe Ke Silsile Me Itmenan Na Kiya Jaye, Aur Pehle Se Hi Awam Ko Fitne Se Aagah Kiya Jaye, Taaki Agar Ye Fitna Aapke Ilaqa Me Na Pohancha Ho To Uske Aane Ko Roka Ja Sake, Aur Agar Khuda Na Khasta Pohanch Gaya Ho To Uska Khatma Kiya Ja Sake.

Is Fitne Ke Muqable Ka Saheeh Tariqa Yahi Hai Ke Ilaqe Ki Tamam Masaajid Me Juma Ki Namaz Ke Mauqe Par Is Silsile Me Guftagu Kar Ke Logon Ko Is Fitne Se Aagah Kiya Jaye. Isi Tarah Hum Un Logon Ko Fitne Se Aagah Kar Sakte Hain Jinko Is Fitna Ke Parcharak Apna Mukhatib Banate Hain. Namaze Juma Ke Ilawa In Logon Ka Koi Rabta Kisi Deeni Rehnumai Ke Nizam Se Nahi Hota Hai. Agar Har Ilaqe Ke Sargarm Khadimaan-E-Deen Apne Apne Ilaqa Ki Fikar Kar Le Aur Yeh Koshish Kar Len Ki Inke Ilaaqe Ki Har Masjid Me Namaz-E-Juma Se Pehle Is Tarah Ki Guftagu Kar Lee Jaye To Umeed Hai Ke Is Fitna Ko Roka Ja Sakega. Agle Page Me Isi Maqsad Se Aik Tehreeri (Written) Khitab/Bayan Diya Ja Raha Hai Take Agar Kisi Masjid Me Namaz Juma Me Is Topic Par Khitab/Bayan Na Ho Sake To Kam Se Kam Ye Tahreeri Khitab Hi Padh Kar Suna Diya Jaye. Yeh Khitab Lucknow Ke Effected Areas Ki Masajid Me Sunaya Gaya Aur Alhamdulillah Iska Fayda Mehsoos Kiya Gaya.

Hamare Yahan Aam Taur Par Kisi Fitne Ki Fikar Us Waqt Ki Jati Hai Jab Uske Shikar Hazaron Lakhon Log Ho Jaate Hain, Aur Us Waqt Fitna Apne Paaun Itna Jama Chuka Hota Hai Ke Usko Khatam Karna Namumkin (Impossible) Ho Chuka Hota Hai. Is Liye Is Nai Shakeeliyat Ki Fikr Abhi Se Karna Lazmi Aur Zaruri Hai, Warna Baad Me Ye Fitna Agar Mazboot Ho Gaya To Phir Usska Khatma Waise Hi Namumkin Ho Jayega Jaise Qadiyaniyat Ka Ho Gaya Hai.

Hazrat Isa (عليه السلام) Ki Aamad Ke Silsila Me Quran O Hadees Ki Kuch Peshangoiyaan Aur Un Ki Roshni Me Shakeel Ka Jaiza

Hazrat Isa (عليه السلام) Ki Aamad Ke Silsila Me Quran O Hadees Ki Kuch Peshangoiyaan Aur Un Ki Roshni Me Shakeel Ka Jaiza

Hazrat Isa  (عليه السلام)  Ke Is Dunya Me Dubara Aane Ke Baare Me Bhi Quran Aur Hadees Me Kuch Aisi Wazeh Baaten Bata Di Gayi Hain Ke Jinko Saamne Rakh Kar Shakeel Aur Qadiyani Jaise Har Jhoote Ki Haqiqat Wazeh Ho Jati Hai. Neeche Kuch Aisi Hi Alaamaten Likhi Jarahi Hain.

1) Is Silsile Me Sabse Pehli Bunyadi Baat Yeh Hai Ki Hazrat Isa (عليه السلام) Ki Aamad Ke Silsile Main Aap ﷺ Ne Jo Kuch Bataya Hai, Us Se Ye Baat Bilkul Yaqeeni Taur Par Maloom Hoti Hai Ki Woh Wahi Isa Bin Maryam  (عليه السلام) Honge Jo Bani Israel Ke Nabi The, Wo Jinki Walida (Mother) Maryam Thi Aur Jo Baghair Waalid (Father) Ke Paida Hue The. Saheeh Bhukari Aur Saheeh Muslim Ke Sath Sath Hadees Ki Doosri Kitabon Me Aisi Kayee Riwayaten Paayi Jaati Hain Jinme Qayamat Ke Qareeb Aapke Aane Ka Tazkira Hai Aur Aap Ka Naam Isa Bin Maryam Liya Gaya Hai. Jin Me Se Kuch Riwayaten Abhi Aap Padhenge. Aur Mehdi Aur Isa Hone Ka Ye Daawedar Shakeel Bin Hanif Hai, Hindustan Ke Ek Ilaaqe Se Talluq Rakhta Hai. Ye Woh Isa Bin Maryam Nahi Hai Jo Bani Israel Ke Nabi The Aur Jo Baghair Baap Ke Paida Hue The Or Jinki Maa Ka Naam Maryam Tha.

2)  Hazrat Isa (عليه السلام) Ke Dobara Aane Ke Silsile Me Bohat Saari Ahadees Me Ye  Bataya Gaya Hai Ke Wo Utrenge (Dekhye: Bukhari : 2222). Jabke Yeh Shakeel Bin Hanif Usmanpur Naami Ek Gaon (Village) Me Apne Walid Haneef Ke Yahan Paida Hua Hai, Aasman Se Nahi Utra Hai.

3) Saheeh Bukhari Aur Saheeh Muslim Ki Ek Hadees Me Rasooullahﷺ  Ka Irshad Hai: “Us Zaat Ki Qasam Jiske Hath Me Meri Jaan Hai Tum Me Ibn Maryam Insaaf Pasand Hukmran Ban Kar Zarur Nazil Honge, Saleeb (Cross/Symbol Of Chiristanity)Ko Tor Denge (Yaani Aap Ke Aane Ke Baad Saare Chiristians Musalman Ho Jayenge, Aur Saleeb (Cross) Ki Ibadat Khatam Ho Jaegi), Khinzeer (Ki Nasal) Ko Qatal Kar Denge…,Aur Maal O Daulat Ki Aisi Farawaani Hogi Ke Koi Sadqa Qabool Karne Wala Nahi Hoga.” (Bukhari : 2222, Muslim: 155/2476).

Ab Zara Is Hadees Ki Roshni Me Shakeel Ka Jayeza Lijye, Wo Naa Ab Tak Hukmran Bana Hai Aur Na Hukmrani Ka Koi Irada Rakhta Hai. Wo To Aurangabad, Maharashtra Ke Paas Ek Basti Me Chupa Baitha Hai Aur Wahan Se Nikalne Ka Naam Hi Nahi Leta Aur Ussne Na Kabhi Koi Saleeb (Cross) Tori Hai Aur Na Kisi Isai (Chiristian) Ne Uske Hath Par Islam Qabool Kiya Hai, Naa Khinzeeron Ko Qatal Kiya Hai Aur Na Uske Aane Ke Baad Duniya Me Maal Wa Daulat Ki Farawani Hui Hai, Aur Naa Gurbat Ka Khatma Hua Hai Ke Sadqaat Lene Waala Koi Na Mile.

4) Quran-E-Majeed Me Surah Nisa Ki Aayat 159 Me Farmaya Gaya Hai Ke (وَإِنْ مِنْ أَهْلِ الْكِتَابِ إِلَّا لَيُؤْمِنَنَّ بِهِ قَبْلَ مَوْتِهِ) Hazrat Isa  (عليه السلام) Ki Maut (Inteqal) Se Pehle Tamam Ahle Kitab (Jews Aur Chiristians) Musalman Ho Jayenge. Aur Shakeel Ke Hath Par Ab Tak Ek Bhi Isai (Chiristian) Islam Nahi Laaya.

Inke Alawa Hazrat Isa  (عليه السلام) Ke Baare Me Aur Bhi Alaamaten Ya Peshangoiyan Hadees Ki Kitabon Me Pai Jaati Hain, Lekin Quran Aur Saheeh Ahadees Me Paayi Jaane Wali Yahi 4 Alaamaten Shakeel Ke Daawe Ko Jhoota Sabit Karne Ke Liye Kaafi Hai, Is Mukhtasar Se Kitabcha Me Mazeed Ki Zarurat Mehsoos Nahi Hoti Hai.

Alamaat-E­-Mehdi Ki Roshni Me Shakeel Ka Jaeza

AlamaatMehdi Ki Roshni Me Shakeel Ka Jaeza

 

Ahadees Se Wazeh Taur Par Maloom Hota Hai Ke Hazrat Mehdi Aur Hazrat Isa  (عليه السلام) 2 Alag Alag Shaksiyaat Hain, Jab Ke Shakeel Gulam Ahmad Qadiyani Ki Tarah Is Baat Ka Daawedar Hai Ke Wo Baik Waqt (Ek Sath) Mehdi Bhi Hai Aur Maseeh Bhi, Zaahir Hai Ke Yahi Ek Baat Uske Jhoote Hone Ke Liye Kafi Hai.

Hazrat Mehdi Ke Baare Me Rasool Akram ﷺ Ki Hadeeso Me Bahut Si Alaamaten Bayan Ki Gayi Hain. Niche Hum Unnme Se Kuch Ka Tazkira Karenge, Phir Unnki Roshni Me Shakeel Ka Jaeza Lenge.

  • Aap ﷺ Ne Bataya Tha Ke Hazrat Mehdi Ka Naam Muhammad Aur Unke Walid Ka Naam Abdullah Hoga(Abu Daud: 4282,Kitab Al Mehdi).

Jabke Shakeel Bin Hanif Hai, Muhammad Bin Abdullah Nahi.

  • Aap ﷺ Ne Ye Bhi Bataya Tha Ke Mehdi Aap ﷺ Ki Hi Nasal Se Honge, Aur Unka Silsila Nasab Hazrat Fatima Tak Pahuchega (Abu Daud: 4284,Kitab Al Mehdi).

Jabke Shakeel Ka Us Khandan Aur Nasal Se Koi Bhi Talluq Nahi, Wo To Hindustani Nasal Ka Hi Hai.

  • Hadees Se Ye Bhi Maloom Hota Hai Ki Hazrat Mehdi Roshan Peshani Ke Honge Yani Gore Rang Ke Honge (Abu Daud:4285, Kitab Al Mehdi)

 Jabke Shakeel Aisa Nahi Hai.

  • Rasooullahﷺ Ne Ye Bhi Bataya Tha Ke Unse Pehle Dunya Bhar Me Zulm Aur Na-Insaafi Ka Raaj Hoga Aur Woh Zulm Ka Khatma Karke Dunya Me Adal O Insaaf Ka Bol Bala Kar Denge.(Abu Dawood: 4282, Kitab-Ul Mehdi).

Jabke Shakeel Ke Dawa E Mehdawiyat Ko 10 Saal Se Zyada Ka Arsa Guzar Gaya Hai Aur Us Arse Me Duniya Me Zulm Aur Na-Insafi Badhi Hi Hai, Kam Nahi Hui Hai.

  • Hadees Se Ye Bhi Maloom Hota Hai Ke Wo Hukumran Bhi Honge. (Abu Dawood: 4285, Kitab-Ul Mehdi)

Aur Shakeel To Hukumrani Ka Khwab Bhi Nahi Dekh Sakta.

  • Ahadees Se Ye Bhi Maloom Hota Hai Ke Ye Muhammad Bin Abdullah Mehdi Ke Mansab (Post) Par Faayez Hone Ke Baad Ziyada Se Ziyada 9 Saal Rahenge. (Tirmizi: 2232, Abwabul Fitan, Baab Baad Baab Maajaa Fil Mehdi). Jinme Se 7 Saal Wo Hukumat Farmaenge (Abu Dawood: 4285, Kitab-Ul Mehdi).

Mehdi Hone Ke Shakeel Bin Hanif Ke Dawe Ko 10 Saal Se Ziyada Ka Waqt Guzar Gaya Hai Aur Abhi Tak Uska Inteqal Nahi Hua Hai Aur Na Usski Hukumat Qayem Hui Hai.

In Ke Ilawa Hazrat Mehdi Ke Baare Me Aur Bhi Alamaaten Ya Peshangoiyaan Hadees Ki Kitabo Me Paayi Jaati Hain, Lekin Sahih Ahadees Me Payi Jane Wali Yahi 5 Alamaten Shakeel Ko Jhoota Sabit Karne Ke Liye Kaafi Hai, Is Mukhtasar Se Kitabche Me Mazeed Ki Zaroorat Mehsoos Nahi Hoti Hai.