ZilHijjah Ke Maheene Ke Ahkamaat 2


Yaum E Arafah Ka Roza
:-

Ashr e Zil Hajjah ke baare me doosra hukm yeh diya gaya hai keh Yakum Zill Hajjah se nau (1-9) ZilHijjah tak jo ke Ramzanul Mubarak ke ba’ad aisa Ashrah hai jis ki bhot ziada khusoosiyaat hain. jis k baare me Nabi Akram Sallallaho Alaihe Wasallam ne farmaya keh in dino me roza rakhna ek saal ke roze rakhne ke barabar hai aur ek raat ki ibadat lailatulQadr ki ibadat k barabar hai. (ibn Maja aur Tirmizi)

Shuru me jo aayat me ne telawat ki us me Allah Ta’ala ne fajr ke waqt ki aur dass raton ki qasam khayee hai. وَالْفَجْرِ (1) وَلَيَالٍ عَشْرٍ is bare me mufassireen ki ek badee jama’at ne likha hai keh is se muraad ZillHajja ki dass raaten hain , jis me Allah ne ibaadat ko Lail atul Qadr ki ibadat ke bararbar rakha hai. Allah ta’ala ham sab ko in auqaat se fayeda uthane ki taufeeque ata farmayen aur us ki barkaat se nawazen. Aameen

Advertisements

ZilHijjah Ke Maheene Ke Ahkamaat 1

ZilHijjah Ke Maheene Ke Ahkamaat :-

Islaam me is maheene se muta’alliq kuchh khusoosi Ahkaam hain. Sab se pehla hukm jo ZilHajjah ka chand dekhte hi ahl e Islaam ko diya gaya woh yeh hai keh Jis shakhs ne is maheene me qurbani karni hai to woh na baal kate aur na nakhun kaate .Iss liye keh hadees me hai keh Nabi Akram Sarwar e Do Aalam Sallallaho Alaihe Wasallam ne Irshaad farmaya keh ZillHajjah ka chaand dekhne ke ba’ad na baal kate jayen aur na nakhun . Iss hukm ko ba’az hazraat ne mustahab aur ba’az ne wajib kaha hai.Bahar haal hukm hai ,iss liye iss par amal karna chahiye

Baal Aur Nakhun Na Kaatne Ki Ahmiyat:- Hamare nazdeek Hakeemul Ummat Qaddasallahu Sirrahu ne farmaya keh iss me hikmat yeh hai keh Choon keh yeh woh zamana hai jis me charon taraf se log khinch khinch kar Hajj karne ke liyeBaitullah ki taraf ja rahe hain.Aisa lagta hai keh Baitullah me koi maqnatees laga hua hai jo charon taraf se logon ko kheench raha hai aur Hazrat Ibraheem A.S . ki dua poori ho rahi hai keh ap ne farmaya

فَاجْعَلْ أَفْئِدَةً مِنَ النَّاسِ تَهْوِي إِلَيْهِمْ

(14:37)
“Aye Allah logon ke dilon ko aisa bana dijiye keh log is ki taraf kheench kheench kar aayen”

lekin bahut se log aise bhi hain jo hajj to karna chahte hain magar us ke liye wasail muhayya nahin , ya koi aur majboori hai. Hamare hazrat farmate the keh Allah Ta’ala un logon ko jo paise ki kami ki wajah se hajj nahin kar sake, kya un ko hajj ki barkat se mahroom farma den ge ? Allah ta’ala ki shaan e Raheemi se yeh bahut baeed hai keh kisi aadmi ko sirf paise na hone ki wajah se mahroom farmaa den.

Chunancheh Allah Ta’ala ne ek chota sa amal batla diya keh tumhen hajj ko jane walon ki thodi si mushabehat ikhtyar karni pade gi ,woh yeh keh jaise Haji hazraat baal aur Nakhun nahin kaatte to tum bhi yeh mushabehat ikhtyaar karlo aur baal aur nakhun na kaato jab tum ne mushabehat paida karli to is tarah un hajiyon se apna rishta jod liya . Lihaaza  jab Allah Ta’ala Arafaat ke maidaan me hajiyon par rahmat ki baarish barsayen ge, to us ka chheenta tum tak zaroor pahunchega

TERE MAHBOOB KI YA RAB SHABAHAT LE KAR AAYA HOON

HAQEEQAT IS KO TU KAR DE ME SOORAT LE KE AAYA HOON

Hazrat farmate hain keh yeh jo kaha ja raha hai keh baal aur nakhun na kato to dar haqeeqat kahne ka maqsad yeh hai keh Aye Allah me wahan tak to na pahunch saka , lekin jaane walon ke saath thodi si mushabehat paida kar li hai to kya me sirf is wajah se mahroom rah jaoonga keh mere paas paise nahin hain. Allah Ta’ala farmate hain Nahin ,Hamari shaan e Raheemi tumhen mahroom nahin kar sakti, jab tum ne mushabehat paida kar li to tum bhi Allah ki rahmaton me zaroor shaamil ho ge.

HUKM E ILAAHI KI AHMIYAT AUR AZMAT

HUKM E ILAAHI KI AHMIYAT AUR AZMAT :-

Ba’az Hindu ya Butt parast eteraaz karte hain keh aap hamen to pattharon ki parastish se mana’a karte hain aur khud Baitullah ki taraf munh kar ke Sajdah karte ho goya un ki ibadat karte ho, to hum me aur tum me kya farq hai ? To Allah jall e shaanahu ne ibtedaye Islam me yeh nazarah dikha diya keh achanak hukm aagaya keh Baitullah ki bajaye baitul Maqdas ki taraf rukh kar ke namaz padho. chunanche Nabi Akram Sallallahu Alaihi wasallam aur Sahabah e kiraam ne 17 maheene Baitullah ki bajaye Baitul Maqdas ki taraf rukh kar ke namaz padhi Halaankeh Huzoor Sallallahu Alaihi wasallam ka dil chahta tha keh Qiblah Baitullah ho Is ki hikmat Allah Ta’ala ne doosray pare me bayan farmayi :

سَيَقُولُ السُّفَهَاءُ مِنَ النَّاسِ مَا وَلَّاهُمْ عَنْ قِبْلَتِهِمُ الَّتِي كَانُوا عَلَيْهَا قُلْ لِلَّهِ الْمَشْرِقُ وَالْمَغْرِبُ(سورة البقره 142)

Maqsad yeh hai keh Baitullah ke patharon me kuch nahin rakha haan Mashriq o Maghrib me jo kuchh hai woh Allah ke qabze me hai.

مَنْ يَتَّبِعُ الرَّسُولَ مِمَّنْ يَنْقَلِبُ عَلَى عَقِبَيْهِ

(para 2 surahalBaqra Ayat no. 143 )

“kaun paighambar ka tabe’a rahta hai aur kaun ulte paaon phir jata hai ”

Hazrat Farooq E Aazam ka Hajr e Aswad Ko Khitaab :-

Chunancheh Hazrat Farooque Aazam R.A Hajr e Aswad ko Bosa dene k liye gaye to bosa dene se pahle Hajr e Aswad se khitab kiya ke “Aye Hajr e Aswad me janta hoon keh tu ek pather hai na koi nafa’a pahunchana tere Qabze me hai aur na koi nuqsaan pahunchana tere bass me hai Lekin agar me ne apni aankhon se Nabi e Akram Sallallaho Alaihe wasallam ko tera bosa lete na dekha hota to me tujhe kabhi bosa na deta . Yeh Nabi Akram sallallaho Alaihe Wasallam ki sunnat hone ki wajah se mojib e ajar o sawab hai Teri zaat me koi taqaddus nahin.” Yahi wajah hai keh ba’az log rukn e Yamani ka bhi bosa le lete hain.Ulama e kiraam ne likha hai ke aisa karna durust nahin hai, kiyon keh yeh amal Janab e Rasool Allah Sallallaho Alaihe Wasallam se sabit nahin. To jis kaam ke liye Allah Ta’ala ne in 2 ebadaton ko in ayyam ke saath makhsoos kiya ke in ayyam me agar woh ebadaten sar anjaam do ge to hamare nazdeek mustahiq e ajr o sawaab ho ge aur agar is se hat kar karo ge to us ki koi qadr o qeemat nahin. Yeh khusoosiyat Allah ne sirf isee maheene ko ataa farmaayee hai .

MINA ME NAMAZ KA HUKM

Jin hazraat ko Hajj par jaane ka mauqa mila hai to woh jante hi hain aur jin ko haazri ka mauqa nahin mila , unhon ne bhi shayed suna hoga keh Haaji hazraat 8 Zillhajjah ko Makkah Mukarramah se rawana ho kar Mina chale jate hain. aur Mina me jane ke ba’ad koi kaam nahin .na Rami hai na Manasik e Hajj me se koi rukn adaa karna hai,balkeh Zohar se le kar agli fajr samet 5 Namazen Mina me adaa karo. Kitni achi baat thi keh Makkah Mukarramah me rah rahe the aur Namazen Masjid e Haram me padh rahe the keh jis me ek namaz padhne ka sawaab ek laakh (100000) Namazon ke sawaab ke barabar hai, Lekin hukm hua keh Masjid e Haram aur us me Namaz padh kar Ek laakh namazon ka sawaab chord kar Mina ki wadi me muqeem ho jao, jahan sirf 5 Namazen padhni hain. is se yeh SABAQ sikhana maqsood hai keh kaheen tumhare zahen me yeh baat na baith jaye keh Masjid e Haram ke patharon me kuchh rakha hai. balkeh jo kuchh hai woh hamare hukm aur hamare Nabi Hazrat Mohammed Sallallahu Alaihi Wasallam ki Sunnat me hai. Agar  koi shakhs kahe keh me ek laakh Namazon ka sawaab chord kar nahin ja sakta to ek lakh to kaja, ek namaz ka bhi sawab nahin mile ga . Isliye keh khilafe Sunnat kaam kar raha hai.

QURBANI KA HUKM

Isi tarah Qurbani hai keh Allah Ta’ala ne saal bhar me teen din makhsoos farmaye hain. 10, 11, 12 ZillHajjah– in teen dino ke ilawah agar aap qurbaani karna chahen to Allah Ta’ala ke yahan us ki koi qadr o qeemat nahin.  Kyu  keh Qurbaani naam hai kisee janwar ke gale par Allah ki raza ke liye chhuri pherna . Idhar aap ne janwar ke gale par chhuri pheri aur udhar Qurbani ka fareezah adaa hua. Lekin agar aap aaj qurbani karen to ek nahin ,100 janwar zubah karlen to woh qurbani ki ibaadat nahin hogi kyu keh yeh aisi Ibaadat hai jo Zillhajjah ke makhsoos ayyam ke ilawah adaa ki hi nahin ja sakti.. Asal sawab Allah ke Hukm aur Sunnat e Nabawee Sallallahu Alaihi wasallam me hai. Maqsad yeh hai keh kisee bhi amal me apni zaat me kuchh nahin rakha, jo kuchh hai Alalh ke hukm aur hamare Nabi e Akram Sallallahu Alaihi wasallam ki Sunnat me hai . Jab kisi bhi amal ke saath Allah Ta’ala ka hukm pewasta ho jaye to woh amal ibaadat ban jata hai aur moajjib e ajr o sawab ban jaye ga aur Allah Ta’ala ka hukm us se hat jaye to ab us ki koi qadr o qeemat nahi. Arafat ke maidan par Allah Ta’ala ki rahmaten nazil hoti hain aur wahan jakar wuqoof karne walon ko jo sawaab milta hai, woh dar haqeeqat is maidan ke zarrat ,pahadiyon, sehraa ki ret, aur un patharon ki wajahse nahin , balkeh jo kuch bhi ajr o sawaab hai woh sirf Allah ke hukm ka hai.. Allah Ta’ala ne farmaya keh 10,11 ,12,Zillhajjah ko janwar ke gale par chhuri pherna aur qurbaani karna moajjib e ajr o sawaab hai to aaj yeh amal Allah ka mehboob ban gaya, Aisa mehboob keh aaj ke din yani yaum un Nahr me khoon bahane ke alawah koi mehboob mashgilah nahin. Lekin wahi qurbani aam din me karte to uska koi nateejah nahin. Batlana dar haqeeqat yeh hai keh kisee bhi ibaadat me aur kisee bhi kaam me apni zaat me koi taqaddus nahin, taqaddus us waqt aata hai , jab Allah ka hukm ho, Goya yeh ek sabaq hai jis me bid ‘at kharabi paida karti hai Bid’at us kaam ka naam hai jo aap az khood ghad kar ibadat bana len us ko na Allah ne ibadat qarar diya ho na Rasool Sallallahu alaihi wasallam ne.