Alamaat-E­-Mehdi Ki Roshni Me Shakeel Ka Jaeza

 

Ahadees Se Wazeh Taur Par Maloom Hota Hai Ke Hazrat Mehdi Aur Hazrat Isa  (عليه السلام) 2 Alag Alag Shaksiyaat Hain, Jab Ke Shakeel Gulam Ahmad Qadiyani Ki Tarah Is Baat Ka Daawedar Hai Ke Wo Baik Waqt (Ek Sath) Mehdi Bhi Hai Aur Maseeh Bhi, Zaahir Hai Ke Yahi Ek Baat Uske Jhoote Hone Ke Liye Kafi Hai.

Hazrat Mehdi Ke Baare Me Rasool Akram ﷺ Ki Hadeeso Me Bahut Si Alaamaten Bayan Ki Gayi Hain. Niche Hum Unnme Se Kuch Ka Tazkira Karenge, Phir Unnki Roshni Me Shakeel Ka Jaeza Lenge.

• Aap ﷺ Ne Bataya Tha Ke Hazrat Mehdi Ka Naam Muhammad Aur Unke Walid Ka Naam Abdullah Hoga(Abu Daud: 4282,Kitab Al Mehdi).

Jabke Shakeel Bin Hanif Hai, Muhammad Bin Abdullah Nahi.

• Aap ﷺ Ne Ye Bhi Bataya Tha Ke Mehdi Aap ﷺ Ki Hi Nasal Se Honge, Aur Unka Silsila Nasab Hazrat Fatima Tak Pahuchega (Abu Daud: 4284,Kitab Al Mehdi).

Jabke Shakeel Ka Us Khandan Aur Nasal Se Koi Bhi Talluq Nahi, Wo To Hindustani Nasal Ka Hi Hai.

• Hadees Se Ye Bhi Maloom Hota Hai Ki Hazrat Mehdi Roshan Peshani Ke Honge Yani Gore Rang Ke Honge (Abu Daud:4285, Kitab Al Mehdi)

 Jabke Shakeel Aisa Nahi Hai.

• Rasooullahﷺ Ne Ye Bhi Bataya Tha Ke Unse Pehle Dunya Bhar Me Zulm Aur Na-Insaafi Ka Raaj Hoga Aur Woh Zulm Ka Khatma Karke Dunya Me Adal O Insaaf Ka Bol Bala Kar Denge.(Abu Dawood: 4282, Kitab-Ul Mehdi).

Jabke Shakeel Ke Dawa E Mehdawiyat Ko 10 Saal Se Zyada Ka Arsa Guzar Gaya Hai Aur Us Arse Me Duniya Me Zulm Aur Na-Insafi Badhi Hi Hai, Kam Nahi Hui Hai.

• Hadees Se Ye Bhi Maloom Hota Hai Ke Wo Hukumran Bhi Honge. (Abu Dawood: 4285, Kitab-Ul Mehdi)

Aur Shakeel To Hukumrani Ka Khwab Bhi Nahi Dekh Sakta.

• Ahadees Se Ye Bhi Maloom Hota Hai Ke Ye Muhammad Bin Abdullah Mehdi Ke Mansab (Post) Par Faayez Hone Ke Baad Ziyada Se Ziyada 9 Saal Rahenge. (Tirmizi: 2232, Abwabul Fitan, Baab Baad Baab Maajaa Fil Mehdi). Jinme Se 7 Saal Wo Hukumat Farmaenge (Abu Dawood: 4285, Kitab-Ul Mehdi).

Mehdi Hone Ke Shakeel Bin Hanif Ke Dawe Ko 10 Saal Se Ziyada Ka Waqt Guzar Gaya Hai Aur Abhi Tak Uska Inteqal Nahi Hua Hai Aur Na Usski Hukumat Qayem Hui Hai.

In Ke Ilawa Hazrat Mehdi Ke Baare Me Aur Bhi Alamaaten Ya Peshangoiyaan Hadees Ki Kitabo Me Paayi Jaati Hain, Lekin Sahih Ahadees Me Payi Jane Wali Yahi 5 Alamaten Shakeel Ko Jhoota Sabit Karne Ke Liye Kaafi Hai, Is Mukhtasar Se Kitabche Me Mazeed Ki Zaroorat Mehsoos Nahi Hoti Hai.

 

Shakeeli Dajjal Vs Haqeeqi (Real) Dajjal

Dajjal Ke Baare Me Shakeeliyo Ka Daawa Itna Ghalat Hai Ke Koi Bhi Aadmi Jise Allah Ne  Aqal Di Ho In Baton Ko Saheeh Maan Hi Nahi Sakta, Aur Isliye Is Silsile Main Tafseeli Guftagu Ki Zaroorat Nahi Hai, Lekin Phir Bhi Itna Batana Zaroori Maloom Hota  He Ka Aap ﷺ  Ne Dajjal Ke Baare Me Jo Kuch Bataya Hai Us Se Wazeh (Clear) Taur Par Maloom Hota Hai Ki Wo Ek Insaan Hi Hoga, 2 Mamalik (Countries) Ka Majmua Ya Satellite Ya Fighter Plane Nahi.

Aap ﷺ Ne Uska Huliya(Appearance) Bhi Bilkul Wazeh Taur Par Bata Diya Hai, Jaise Bukhari Ki Ek Hadees (701) Me Hai Ke Aap ﷺ  Ko Khawab Me Dajjal Dikhaya Gaya, To Wo Ek Laal Rang Ka Mota Shaks Tha, Uske Baal (Hair) Ghungraile The, Dahini (Right) Aankh Se Kaana Tha, Yahan Tak Ke Us Hadees Me Aap ﷺ  Ne Ye Bhi Bataya Tha Ke Wo Qabile (Tribe) Khuza’a  Ke Ek Aadmi Ibne Qatan Ki Tarah Tha. Inn Wazeh Nishaniyon Ke Baad Koi Gunjaish Nahi Rehti Ki Koi Bhi Aqal-Mand Shaks Ye Kahe Ke Dajjal Ek Shaks Na Hokar 2 Countries Ka Majmua He, Aur Uski Ankh (Eye) Satellite Hai.

Shakeeliyat Ek Nayee (New) Qadiyaniyat Ek Nayee Gumrahi

 

Shakeel Bin Hanif Darbhanga Bihar Ke Usmanpur Ka Rehne Wala Ek Shaks Hai, Jisne Kuch Saal Pehle Jab Ke Wo Delhi Me Tha Mehdi Hone Aur Phir Mehdi Aur Maseeh Mau’ud (Hazrat Eisa) Hone Ka Dawa Kiya, Aur Is Tarah Ek Nayee Qadiyaniyat Paida Hui. Isne Pehle Delhi Ke Mukhtalif Mohallo Me Apne Mehdi Aur Maseeh Hone Ki Tableegh Ki, Lekin Har Jagah Se Ise Kuch Dino Ke Baad Hatna Pada. Pehle Mohalla “Nabi Karim” (Area/Mohalle Ka Naam) Ko Isne Apni Activities Ka Centre Banaya, Aur Phir Laxmi Nagar (Area/Mohalle Ka Naam) Ke Do Mukhtalif Ilaaqon Me Apne Mission Ko Chalata Raha. Delhi Me Rehte Hue Usne Khaas Taur Par Un Naujawano Ko Apna Nishana Banaya Jo Delhi Ke Colleges/Universities Me Talim Hasil Karne Ke Liye Wahan Aate The, Lekin Jaise Hi Logon Ko In Harkaton Ki Khabar Hoti Uske Khilaf Action Lete Aur Use Apna Thikana Badalna Padta. Aakhir Use Delhi Se Hatne Ka Faisla Karna Pada, Aur Usne Apna Thikana Maharashtra Ke District Aurangabad Me Is Tarah Banaliya Ke Kisi Ne Uske Liye Aik Pura Ilaqa Khareed Kar Ek Nayee Basti Basa Di, Jisme Wo Aur Uske “Hawari” (Sathi) Rahte Hain.

Mulk Ke Mukhtalif Hissso Me Is Jhoote Mehdi Aur Maseeh Ki Dawat O Tableegh Ka Silsila Barso Se Kaafi Tezi Ke Sath Jaari Hai. Delhi, Bihar, Jharkhand, Maharastra, Andhra Pradesh Etc. Me Iske Fitne Me Achchi Khasi Tadad Me Log Aachuke Hain Aur Alhamdulillah Har Jagah Kuch Na Kuch Logon Ne Uske Muqable Ki Fikr Bhi Shuroo Kar Di Hai.

Hum Samajhte The Ke Uttar Pradesh Is Fitne Se Mahfooz Hai Aur Ab Tak Yahan Shakeeliyo Ne Apne Paaon Nahi Phailae Hain, Lekin Maloom Hua Ke Hum Naa-Waaqif The. Up Me Balke Lucknow Me Bhi Kuch Log Is Fitne Ke Parcharak Ban Kar Taqreeban 1.5 Saal Se Active Hain Aur Badi Raazdaari Lekin Tezi Ke Sath Apni Activities Jaari Rakhe Hue Hain, Aur Afsos Ke Inke Fitne Ka Shikar Hamare Kuch Sada Naujawan Ban Rahe Hain, Balke  Har Kuch Dino Ke Baad Lucknow Aur Up Ke Mukhtalif Zilo (Districts) Ke Kuch Log Is Fitne Ke Shikar Ho Kar Is Jhoote Maseeh Wa Mehdi Ke Hath Par Bait Karne Jaa Rahe Hain, Iska Matlab Ye Hai Ke Ye Fitna Apni Activities Is Tarah Khufiya Andaz Me Chalaane Me Kaamyaab Hai Ke Wo Hamare Ilaqe Me Hamare Naujawano Par Mehnat Kar Rahe Hain Aur Hum Ko Khabar Tak Nahi Hai. Hamari Na Waaqfi Ya Be-Khabri Ki Ye Soorate Haal Bahut Fikr Me Dalne Wali He, Aur Hame Bohat Kuch Sochne Par Majboor Karti Hai. Khud Hum Lucknow Ke Jis Mohalle Me Rehte Hain, Wahan Bhi In Ki Activities Jaari Hai, Aur Isi Mohalle Ke Ek Naujawan Ke Zariye Hi Hame Is Fitne Ke Wajood Ki Ittela Mili Thi.

In Logon Ke Kaam Karne Ka Tariqa Ye Hai Ke Ye Bahut Khufiya Taur Par Kisi Naujawan Se Rabta (Contact) Karte Hain. Ye Naujawan Aam Taur Par Kisi College Ya University Ka Aisa Student Hota He Ke Jiska Kisi Aalim Se Koi Rabta Nahi Hota. Ye Pehle Us Se Aam Deeni Baaten Karte Hain, Aur Chunke Is Fitne Ke Tamam Parcharak Apna Huliya (Appearance) Aisa Banaye Phirte Hain Ke Inko Dekh Kar Har Shaks Yahi Mehsoos Kare Ke Ye Bahut Muttab-E-Sunnat (Sunnat Ke Paband) Qism Ke Deendar Naujawan Hain, Jaise Lambi Darhiyan Rakhte Hain, Libas Me Lambe Kurte Aur Oonchi Shalwaro Ka Istemal Karte Hain, Guftagu Me Baar Baar Alhamdulillah, Subhan-Allah, Masha-Allah, Insha-Allah Aur Inn Jaise Alfaaz (Words) Bohat Istemal Karte Hain. Is Liye Woh Sada Aur Nawaqif Naujawan Inse Bahut Ziyada Mutassir (Impressed) Hojata Hai Aur Inhe Bohat Deendar Samjhne Lagta Hai.

Apne Baare Me Ye Tas’sur (Impression) Banane  Ke Baad Ye Us Student Se Alamat-E-Qayamat (Qayamat Ki Nishaniyon) Ka Tazkira Karte Hain, Aur Unko Science Ki Kamyabiyon Aur Dunya Ke Haalat Par Is Tarah Fit Karte Hain Ke Aadmi Un Ki Baat Ko Bohat Logical Samajhne Lagta He. Is Darmiyan Ye Bahut Hoshiyari Ke Sath Ye Koshish Bhi Karte Hain Ke Samne Wale Ke Zehan Me Ulama Ki Tasweer Aisi Bana Den Ke Wo Unki Kisi Baat Ki Tasdeeq (Verification) Ulama Se Karane Ki Zaroorat Na Samjhe, Jaise Ye Kehte Hain Ke Ulama Ko In Alamaat-E-Qayamat (Qayamat Ki Nishaniyon) Ka Kuch Ilm (Knowledge) Nahi Hota, Is Liye Ke Unnhe Madrason Me Ye Hadeesen Padhai Hi Nahi Jati, Unnhe Bas Hadees Ki Kitabon Ke Kuch Muntakhab Abwaab [Selected Chapters] Padha Diye Jaate Hain, Jinka Talluq Namaz, Roza Jaise Masael Se Hota Hai, Taaki Ye Kisi Masjid Ke Imam Ya Kisi Madarsa Ke Mudarris (Teacher) Ban Saken. Inka Mukhatib Jo Ab-Tak Inke Deendar Hone Ka Tas’sur (Impression) Rakhta Hai Ye Baten Sunke Unko Deen Ka Aisa Maahir (Expert) Bhi Samjhne Lagta Hai Ke Jo Ulama Se Ziyada Deen Ko Janne Waala Hai, Aur Ab Usska Haal Ye Hota Hai Ke Ye Use Jo Batade Wo Usper Yaqeen Karle.

Uske Baad Ye Parcharak  Yeh Batate Hai Ke Dajjal Aa Chuka Hai. Wo America Aur France Ko Dajjal Batate Hain Aur Kehte Hain Ke Rasooullahﷺ  Ne Ek Hadees Me Jo Ye Bataya Tha Ke Dajjal Ki Peshani Par Kaafir Likha Hoga Usse Aap ﷺ  Ka Ishara Yahi Dono Mumalik (Countries) The, Isliye Ke Jab In Dono Ka Naam Ek Sath Likha Jaye (امریکا + فرانس) Toh Beech Me Kaafir Likha Hua Rehta Hai. Dajjal Ki Ek Aankh (Eye) Hone Ka Matlab Wo Satellite Ko Batate Hain. Kuch Hadeeson Me Dajjal Ke Bare Me Hai Ke Wo Ek Gadhe Par Hoga, Ye Log Kehte Hain Ke Is Ka Matlab Fighter Plane Hai Aur Isi Tarah Ki Kuch Aur Baaten Karte Hain. Dajjal Ke Baare Me Apni Aisi Guftaguo Ke Baad  Ye Kehte Hain Ke Dajjal Ke Aane Ke Baad Mehdi Aur Maseeh Ko Aana Tha Aur Woh Aa Chuke Hain Aur Ab Nijaat Ka Bas Yahi Ek Zariya Hai Ke Hum Unke Hath Par Bait Kar Len. Agar Saamne Wala Koi Bahut Saada Aadmi Hota Hai Aur Ye Khwahish Zaahir Karta Hai Ke Mujhe Bhi Mehdi Ke Hath Par Bait Karadi Jaye To Ise (Aam Taur Par) Pehle Ilaqai Ameer Ke Paas Bheja Jaata Hai, Jaise Up Me Banaras Bhej Diya Jaata Hai, Jahan Banaras Hindu University (Bhu) Ke Ek Student Se Uski Mulaqat Hoti Hai. Ye Sahab Up Me Is Jhoote Mehdi Wa Maseeh Ke Mission Ke Ameer Bataye Jaate Hain. Aur Phir Kuch Dino Ke Baad Aurangabad (M.P) Bhej Kar Shakeel Ke Hatho Par Bait Kara Di Jati Hai, Lekin Is Baat Ka Bahut Khayal Rakha  Jata Hai Ke Bait Se Pehle Is Jhoote Mehdi Wa Maseeh Ka Asli Naam Saamne Na Aae, Yahan Tak Ke Logon Ke Poochne Par Bhi Ye Log Iska Asli Naam Bhi Nahi Batate Hain Taaki Agar Ye Shaks Kahin Kisi Se Tazkira Kar Bhi De To Bhi Logon Ko Malum Na Ho Paaye Ke Ye Kis Jhoote Maseeh Ki Dawat Di Ja Rahi Hai.

Agle Safhat (Pages) Me Dajjal, Hazrat Mehdi Aur Hazrat Isa (عليه السلام) Ke Baare Men Saheeh Hadeeson Me Batai Gayi Chand Nishaniyon Ka Tazkira Karke Inki Roshni Me Shakeel Ki Baton Ka Jayeza Liya (Analysis) Jaa Raha Hai, Taaki Ye Baat Bilkul Clear Ho Jaye Ke Shakeel Bin Hanif Jhoota Hai.